Sarpur | Jóladagatal RSS feed for this section

2010 Jóladagatal #4

4 Des

Vííí, enn einn glugginn í jóladagatalinu til að opna! Í dag er 4. desember og það eru 20 dagar til jóla! Ég ákvað að gera englahárskrans því að mér finnst englahár alveg lúmskt skemmtilegt. Nema kannski í þrifunum eftir jólin, þá vill það sitja dálítið eftir á gólfinu 🙂 Hugmyndin er héðan en ég bætti aðeins við og nýtti það sem ég átti til.

Efniviður:

  • Útsaumshringur úr tré eða plasti (eða annar nokkuð stór hringur sem til er á heimilinu, ca. 20 cm)
  • Englahár
  • Annað skraut (ef vill)

Það sem er gott við að nota svona útsaumshring (þ.e. tvöfaldan hring sem maður setur útsaumsstykki í) er að á þeim er hanki. Hankinn er mikilvægur við að vefja englahárinu utan um hringinn því að þar byrjar maður – og felur endann í leiðinni. Svo er hann auðvitað líka til að hengja fínheitin upp þegar kransinn er tilbúinn!

Ég notaði bara ytri hluta plasthringsins og það er alveg nóg. Svo er bara vafið allan hringinn – og passað að englahárið sé sem minnst beyglað og nokkuð þétt!

Sem skraut mætti taka þunnan pappír, brjóta saman í harmonikku og binda í miðjunni.

Með því að klippa hann til og ýfa má gera smávegis skraut. Ég gerði dúsk úr garni sem ég notaði líka.

Á endanum lítur kransinn svona út – pínu retró og fínn! 🙂

2010 Jóladagatal #3

3 Des

Í dag er 3. desember og því 21 dagur til jóla – það er ekki neitt! Þriðji glugginn í jóladagatalinu verður opnaður í dag og í honum eru origami-jólapakkar. Hugmyndin og leiðbeiningarnar eru héðan og ég skemmti mér stórkostlega við að reyna að finna út úr origamiinu. Það er nefnilega smáheilaleikfimi – e-ð aðeins meira en að klippa og líma 😉

Efniviður:

  • Pappír, t.d. gamlar bækur (ég notaði innvolsið úr bókinni sem ég gerði í Fimmtudagsföndri #7)
  • Skrautborða og vír

Byrjað er á því að klippa niður í ferninga 8 blöð, fjögur fara í botninn og 4 í lokið. Ég notaði ca. 8-10 cm stóra ferninga.

Til að byrja er fyrsta blaðið brotið til helminga:

og helmingurinn aftur til helminga:

Síðan er það brotið þvert yfir:

Efra hornið hægra megin er svo brotið í átt að þverbrotinu:

– og miðjan á blaðinu brotin í átt að neðra horninu vinstra megin þar sem þverbrotið byrjar:

Þegar rétt er úr þessu er síðan langi hlutinn (sem er vinstra megin á myndinni fyrir ofan) brotinn aftur fyrir kassann. Þá er komið eitt af fjórum hornum kassans!

Þetta þarf svo að endurtaka þrisvar sinnum og smella hornunum saman:

Þegar kassinn er kominn er þetta gert alveg eins með hin 4 blöðin sem mynda lokið! Og það þarf sko ekkert lím til að festa kassann saman!

Að öllum líkindum er kassinn ykkar á þessum tímapunkti pínulítið laus í sér, t.d. ystu blöðin. Þegar skrautborði er að lokum bundinn utan um hann ætti hann þó að verða áferðarfallegri!

Þegar vír hefur verið brugðið í gegnum slaufuna á pakkanum er hægt að nota þessa litlu kassa sem jólaskraut!

2010 Jóladagatal #2

2 Des

Þá er kransinn kominn á útihurðina og tími til kominn að taka til við glugga nr. 2 í jóladagatalinu!

Í dag er 2. desember og 22 dagar til jóla! Spennan fer að magnast og sérstaklega hjá litlu krökkunum sem eru að fatta að þau fá súkkulaði á hverjum degi í jóladagatalinu sínu 😉

Ekkert súkkulaði í þessu jóladagatali – bara föndur! Og í dag ætla ég í endurvinnslu og gera pakkamerkimiða.

 

 

Efniviður:

  • Gömul litrík jólakort
  • Skæri
  • Skapalón fyrir merkimiða (keypt í Föndurstofunni á ca. 800 kr) eða merkimiðagatara (paper punch – fæst t.d. í Litum og föndri og kostar ca. 4400 kr)
  • Gatari/götunarbyssa

Nú er um að gera að nýta fallegu gömlu jólakortin sem maður tímir ekki að henda og búa til pakkamerkimiða fyrir jólagjafirnar.

Ég fjárfesti í skapalóni (sem er held ég notað í skrapp-föndur) og get því gert merkimiða í fjölmörgum stærðum og gerðum. Það verður bara að passa að bakhlið jólakortanna sé alveg hrein og auð!

Svo strika ég bara fyrir merkimiðunum:

… og klippi út!

Að lokum eru miðarnir svo gataðir með götunarbyssunni/gataranum.

Og þá eru þeir tilbúnir!

Eftir smástund var ég komin með heilan haug! Svona er hægt að láta jólakortin lifa a.m.k. tvisvar – og spara pening og sleppa því að kaupa merkimiða úti í búð!

2010 Jóladagatal #1

1 Des

Jólabörn nær og fjær (hæ Hilla)!

Nú hefst niðurtalningin og jóladagatal Fimmtudagsföndursins 2010, jibbí! 🙂 Hér ætla ég að birta nýtt föndur með leiðbeiningum á hverjum degi til jóla – rétt eins og í fyrra en það má skoða á stikunni hérna fyrir ofan undir Jóladagatal 2009.

Ég ætla að reyna að föndra þetta mestmegnis sjálf en eins og með venjulega Fimmtudagsföndrið eru hugmyndirnar yfirleitt héðan og þaðan af netinu. Ég ætla þó ekki að sverja fyrir það að ein og ein hugmynd slæðist inn beint af netinu en þá vísa ég á síðuna sem ég stel hugmyndinni af.

Í dag er 1. desember og því 23 dagar til jóla. Þið munið kannski að ég gerði jólakrans á hurðina í fyrsta glugga jóladagatalsins í fyrra. Hann leit svona út:

Í dag ætla ég líka að gera krans á hurðina. Hugmyndin er upphaflega héðan en ég ætla aðeins að staðfæra hana að mínum hugmyndum (reyna örlítið að draga úr ameríska stílnum) og því sem ég á til í skúffunum.

Efniviður:

  • Pappírskarton og jólapappír/marglitur pappír af annarri gerð (bara ekki ljósritunarpappír, of þunnur)
  • Lím og límbyssa
  • Járnhringur með hanka – hægt að gera t.d. úr vírherðatré (einnig flatir tréhringir eins og þessi)
  • Heftari
  • Ýmislegt jólaskraut eða annað skraut; könglar o.fl.

Ég á heilmikið af skrautlegum jólapappír og mun meira en ég kem nokkurn tímann til með að nýta þannig að ég ákvað að fara aðeins lengri leið og líma hann á A4 karton. Síðan klippti ég hann niður í lengjur í nokkrum stærðum, frá ca 1 cm upp í 3 cm.

Lengjurnar eru brotnar saman eins og harmónikka og ef ég man rétt, gerði ég svona í Fimmtudagsföndrinu #23. Endarnir eru svo heftaðir saman og lítið karton límt aftan á til að halda hringnum saman.

Svo er bara að láta hugmyndaflugið ráða og skreyta með alls kyns dóti! 🙂 Ég notaði dálítið af gömlu skrauti sem ég notaði til að skreyta tágakrans sem ég átti (svona með áföstum vír sem var jafnvel dottinn af).

Hringirnir eru svo límdir á járn-/tréhringinn með límbyssunni. Best er að byrja á þessum stærstu og bæta svo við og hafa þetta svolítið þétt. Ég var með svo grannan járnhring að ég náði ekki nema einfaldri röð en breiðara undirlag leyfir alveg tvöfalda röð eða svona „ofan á hvern annan“.

Svo er sniðugt að vera með e-ð lítið skraut til að líma á milli ef það verður autt pláss:

Svona lítur þetta þá út að aftan:

… og framan:

Þá er bara að hengja upp!

Jóladagatal #24

24 Des

(Gleðileg jól öll sömul! Ég kom mér aldrei í það að opna föndurgluggana fyrir Þorláksmessu og aðfangadag en finnst hálf hallærislegt að sleppa þeim svo að …)

Hér kemur 24. glugginn á aðfangadag: Innpökkun gjafa!

Í dag verða ekki hefðbundnar leiðbeiningar heldur ætla ég að setja inn myndir af gjöfunum innpökkuðum.

Ég notaði hefðbundinn umbúðapappír í brúnum og grænum lit og gerði svo ýmsar skreytingarútfærslur. Það sem ég hafði ákveðið var að skrifa nafn hvers og eins á pakkann (sbr. þessa hugmynd) og ég gerði það á flesta pakkana (a.m.k. hjá flestum í fjölskyldunni sem kunna að lesa 😉 )

Síðan prentaði ég út jólalaganótur og notaði sem skraut, sem og kúlurnar úr 19. glugga hér að framan.

Ég fann ofsalega skemmtilegan blúndulímborða í Megastore í Smáralind og hann kom vel út á pakka:

Ég gerði um 100 stk af dúskum fyrir jólin (þ.e. í jólagjöf) og átti nokkra afgangs sem ég skreytti pakka með:

Ég varð mér líka út um litla trébúta sem ég notaði sem pakkamiða á suma pakka:

Í Megastore fann ég loksins pappírsdúllur sem ég hef verið að leita að í allt haust, bæði í hvítu og gylltu og notaði þær á pakka:

Ég gerði líka nokkra pakkaskrautið í 21. glugga og setti á skókassa með dúsk og skreytti líka með úrklippum af jólakortunum í ár:

Takk kærlega fyrir að hafa lesið (og kommentað) jóladagatalið mitt í ár! Ég skemmti mér konunglega þrátt fyrir að hafa ekki náð að föndra næstum því allt sem mig langaði að gera. Stundum varð ég því að finna netleiðbeiningar að hlutum sem ég náði ekki að gera…vona að þær hafi ekki verið síðri!

Ég fer kannski að snúa mér meira að föndurbloggi, eins og svo margir virðast lesa og skemmta sér yfir!

Jóladagatal #23

23 Des

(Gleðileg jól öll sömul! Ég kom mér aldrei í það að opna föndurgluggana fyrir Þorláksmessu og aðfangadag en finnst hálf hallærislegt að sleppa þeim svo að …)

… hér kemur 23. glugginn: Pappírsstjarna!

Ég rakst fyrst á þessar stjörnur í tölvudeildinni í vinnunni en þar var jólaskreytingarkeppni. Mér var sagt að þetta væri bara minnsta mál í heimi að gera og þess vegna ætla ég að smella þessu hér inn.

Það sem þarf eru einfaldlega nokkur A4-blöð, skæri, glært límband og heftari.

Til að búa stjörnuna til þarf 6 A4-blöð, eitt fyrir hvern arm. Byrjað er á því að sníða hvert blað þannig að allar hliðar séu jafnlangar. Síðan er blaðið brotið í tvennt svo að þríhyrningur myndast. Í hann eru svo klippt sex sinnum, þrisvar hægra megin og þrisvar vinstra megin, sbr. myndina:

Síðan er blaðið brotið í sundur og þá á það að líta svona út:

Byrjað er á því að rúlla miðjunni þétt saman og mynda svona pulsu:

Síðan er blaðinu snúið við og næstinnsti hringurinn límdur saman í hina áttina. Hann er mun víðari og sívalari en fyrsti hringurinn.

Svona er einnig gert við þriðja og fjórða hringinn og að endingu lítur armurinn svona út:

Þá er fyrsti armur stjörnunnar tilbúinn og nú þarf að gera slíkt hið sama við hina fimm. Síðan er að festa alla armana saman. Fyrst eru þrír armar festir saman með því að taka efst um þá alla með einni hönd og hefta saman.

Síðan er hinn helmingur stjörnunnar heftaður við hinn fyrri.

Gott er að hefta armana saman til að koma í veg fyrir að þeir losni í sundur. Best er að hefta þar sem armarnir eru límdir saman á ysta hringnum.

Nú á stjarnan að vera tilbúin!
Fleiri föndurbloggarar hafa notað þetta mynstur t.d. í fíltefni. Þá er búinn til einn stjörnuarmur og í stað þess að líma endana saman eru þeir saumaðir saman. Hægt er að búa til fínasta óróa úr þessu:

Hugmynd: Stolið héðan!

Jóladagatal #22

22 Des

Það styttist óðum í jólin og síðasti vinnudagurinn fyrir jól er í dag, jibbí!
Ég ætla að setja inn smá jólaföndur fyrir nammigrísina í dag: „Kossamistiltein“ og molatré! Kannski hafið þið séð þetta áður en aldrei er góð (nammi)vísa of oft kveðin!

Fyrst er það „kossamistilteinninn“ eða jólaskraut með Hershey’s kossum. Í það þarf að nota:

  • Frauðplastkúlu/-r (fer eftir því hversu mikill nammigrís þú ert, hvort þú gerir eina eða tvær:) )
  • Hershey’s súkkulaðikossapoka (jólamolarnir eru marglitir, en annars er hægt að nota þessa silfruðu)
  • Borði og límbyssa

Fyrst er borað í gegnum miðja frauðplastkúluna með blýanti eða penna og borði þræddur í gegn. Hann verður að vera nógu langur til að þræða líka í gegnum neðri kúluna ef kúlurnar eru tvær. Borðinn er svo hnýttur undir kúlunni.

Því næst er súkkulaðið límt á með límbyssu (varúð – límið er mjög heitt!)
Síðan má hengja þetta svona upp:

Önnur nammiútfærsla er molatréð. Það er svipuð hugsun og með kossana, en þarf ekki endilega að nota límbyssu.

Það sem þarf er:

  • Frauðplastkeilu
  • Títuprjónar, hefti eða límbyssa
  • Alls kyns molar í bréfi (t.d. Macintosh, Fazer Mint o.fl.)
  • Skraut

Molarnir eru svo bara festir á keiluna með títuprjónum eða lími og byrjað neðst. Þannig vinnur maður sig upp á toppinn og setur svo borða eða skraut efst. Tilvalin jólagjöf fyrir sælgætisfíkla! 🙂

Jóladagatal #21

21 Des

Jæja, þá er maður heldur betur kominn í jólagírinn. Brátt fer líka að líða að því að jólagjöfum verði pakkað inn og í 21. glugganum er auðvelt jólapakkaskraut.

Það sem þarf er:

  • Skæri
  • Tómar klósettrúllur
  • Marglitt ullargarn (a.m.k. 120 cm langt)

Byrjað er á því að brjóta klósettrúlluna saman og klippa niður í ca. 1 cm langa búta.

Síðan er bara hafist handa við að vefja garninu á. Passið að skilja eftir nægan enda þegar þið byrjið og að vefja nokkuð þétt. Þegar komið er hringinn þá eru endarnir tveir bundnir saman.

Ef gera á fleiri en eitt skraut er slíkt hið sama gert við aðra búta.

Síðan er bara að festa skrautið á pakkann. Fleiri not má örugglega finna fyrir svona skraut, t.d. sem borðskraut, sérvéttuhringi eða sem jólatrésskraut!

Hugmynd: Stolið samviskulaust héðan!

Jóladagatal #20

20 Des

Í dag er 20. desember og föndur dagsins er fyrir alla pípuhreinsaravini: Pípuhreinsaraórói eða -hengi.

Það sem þarf eru bara pípuhreinsarar (í hengið á myndinni voru notaðir um 150), skæri og þolinmæði! Þetta tekur dálítinn tíma en kemur ofsalega skemmtilega út sem órói, hengi fyrir glugga eða til að skipta herbergi upp eða jafnvel hangandi yfir lampaskerm.

1. Til að gera blómblöðin, er pípuhreinsarinn beygður til helminga og festur saman með því að snúa endana tvo saman. Um 1 cm er síðan skilinn eftir við hvorn enda. Síðan er myndað blómaform með því að teygja pípuhreinsarann aðeins til. Þetta getur líka litið svolítið út eins og fiskur.

2. Til að gera miðjuna á blóminu er pípuhreinsari klipptur í tvennt og beygður í hring, endarnir festir saman og gengið frá þeim með því að vefja um hringinn sjálfan á hvora hlið.

3. Til að gera demantsformið, er heill pípuhreinsari beygður í rétt horn (90°) á nokkrum stöðum. Síðan er endunum snúið saman eins og  með blómblöðin og skilinn eftir ca. 1 cm á hvorum enda.

4. Þessir hlutar eru svo allir festir saman með því að endarnir á blómblöðunum eru festir við miðjuna og demantsformin við blómblöðin. Allir lausir endar eru festir við annað form. Til að tengja heilt blóm við annað eru auka pípuhreinsarar notaðir til festingar.

5. Síðan er haldið áfram að búa til svona blóm og form þar til nóg efni er í hengið eða óróann. Þá eru farið að festa þau öll saman á víð og dreif. Gott að halda henginu uppi til að sjá hvar bæta þarf við. Efst er svo bætt við pípuhreinsurum í hringjum til að hengja upp. Voilá!

Hugmynd: Stolið héðan!

Jóladagatal #19

19 Des

19. glugginn er svolítið sem ég hef verið að prófa og ætla að nota t.d. í innpökkun jólagjafa í ár; pappírsjólakúlur.

Það sem þarf er:

  • Litríkur pappír
  • Skæri (ég notaði reyndar skurðarhníf)
  • Gatari
  • Litlir stálpinnar sem notaðir eru til að festa pappírinn saman, keypti í föndurbúð en fást örugglega víðar.

Byrjað á því að klippa/skera pappírinn til. Ég prentaði út mynstur af netinu sem náði langsum yfir A4-síðu og prófaði annars vegar að klippa það í tvennt og þrennt, til að fá tvær mismunandi stærðir af kúlum.

Nota þarf 10-15 renninga af pappír. Þeir eru síðan gataðir með gataranum. Ég er með gatara sem gerir lítið gat og tekur ekki mjög mikið í einu þannig að ég varð að skipta bunkanum upp.

Síðan eru stálpinnarnir festir í gatið. Þeir eru klofnir í endann svo að hægt er að brjóta þá út og festa þannig pappírinn saman.

Svona lítur þá pappírsbunkinn út að aftan:

Þegar þetta er tilbúið er byrjað á því að snúa varlega við síðasta renningnum þannig að mynstrið snúi út.

Síðan er restinni snúið á sama hátt. Passið bara að festingin aftan á stálpinnanum rífi ekki pappírinn.

Mínar jólakúlur komu svona út: Sú minni varð þéttari og meiri kúla því að þar voru fleiri renningar, en sú stærri gisnari en samt svolítið flott.

Svo má festa bandspotta í kúlurnar og hengja t.d. á jólatréð eða festa á pakkann. Einnig er hægt að festa nokkrar saman og búa til óróa. Svo má auðvitað nota þær til annars skrauts; setja nokkrar saman í glæran vasa sem borðskraut t.d.

Hugmynd: M.a. héðan!