Fimmtudagsföndurrófan kveður!

Elsku lesendur!
Í dag er síðasti fimmtudagur ársins 2010 og því ekki úr vegi að líta yfir liðið ár!

Upphafið

Ég byrjaði að leggja drög að þessu föndurverkefni í fyrstu viku ársins og fyrsta fimmtudagsföndrið var áramótaspöngin um síðustu áramót:

Í byrjun ákvað ég að fara varlega í að lýsa því yfir að ég myndi pósta í hverri viku, þar sem ég þekki sjálfa mig og hélt að ég myndi fljótt missa úr einhverja fimmtudaga. Fljótlega komst föndrið þó upp í rútínu og nokkrar hugmyndir vann ég dálítið fram í tímann. Ég var þó miklu oftar að leggja lokahönd á föndrið helgina áður en það birtist, eða jafnvel bara kvöldið áður 🙂

Ég hef verið ansi dugleg að sk0ða föndur á netinu í nokkurn tíma og er með stórt safn tengla (bookmarks) sem ég er alltaf að bæta í. Fólk hefur líka verið duglegt að gauka að mér ýmsum hugmyndum sem ég er mjög þakklát fyrir. Hugmyndirnar virðast kannski vera óþrjótandi hjá mér- en það er þá vegna þess að netið er auðvitað endalaust! 😉

Jóladagatalið hefur mér líka fundist ótrúlega skemmtilegt þrátt fyrir að það hafi verið meira en að segja það að henda inn föndri á hverjum einasta degi nú í desember. Þið munið að skoða það hérna á stikunni fyrir ofan (Jóladagatal 2010 og 2009)

Markmiðið

Markmiðið með föndrinu hefur alls ekki verið að „hanna“ eitt eða neitt sem ég gæti gert að mínu. Það væri líka í hæsta máta óviðeigandi þar sem ég nýti nánast undantekningarlaust hugmyndir annarra!

Mig langaði miklu frekar að sýna fram á að venjuleg föndurrófa eins og ég, með tíu þumalfingur þegar kemur að saumavélum og sem kann ekki að prjóna, getur samt með góðum leiðbeiningum búið til ýmislegt sniðugt og hagnýtt! Ekki síst þegar kemur að því að endurvinna gamalt og nota í nýjum tilgangi eða með nýjum áherslum.

Eins og þið hafið tekið eftir hef ég verið nærri vikulegur gestur í Góða hirðinum og mæli eindregið með þeirri búð fyrir allar föndurrófur. Þar er sko allt milli himins og jarðar hægt að finna! Mig langar til að vinna að því að vera umhverfisvæn og þess vegna er mjög sniðugt að nýta gamla hluti.

Auk þess gefa gamlir hlutir með sögu alltaf sérstakt yfirbragð og tengslin geta orðið skemmtilegri fyrir vikið. Gamli ónýti eyrnalokkurinn sem hefur verið í fjölskyldunni heillengi en enginn getur notað lengur, getur nefnilega sómt sér prýðilega sem skraut á hárspöng og fær þar með nýtt gildi!

Takk kærlega fyrir mig!

Með þessum síðasta föndurpósti langar mig að þakka ykkur öllum sem lásuð og höfðuð gagn (og jafnvel gaman) af því sem ég hef verið að gera. Þið hafið verið ótrúlega mörg og mun fleiri en ég átti nokkurn tímann von á!

Það hefur gefið mér svo mikið að sjá allar heimsóknirnar sem losa 20.000 á þessu ári (!) og ekki hvað síst að lesa kommentin frá ykkur 🙂

Ég er ekki hætt að föndra og hver veit nema hingað slæðist föndur á næsta ári en ég ætla samt ekki að halda þessu úti vikulega 🙂

Að lokum langar mig að henda inn þeim fimmtudagsföndrum sem ykkur líkaði hvað best við og fengu langflestar heimsóknir, svona nokkurs konar topp 10-lista yfir fimmtudagsföndrið 🙂

10. Glasamottur með álímdum landakortum – birt 13. maí

9. Hárspangir með íslenska fánanum – birt 27. maí
(í miðju Eurovisioni :))

8. Skál úr gamalli vinylplötu – birt 8. júlí

7. Kökudiskur gerður úr gömlum diskum og glösum – birt 14. janúar

6. Hálsfesti úr gardínufestingu – birt 25. mars

5. Uppgerður lampafótur úr Góða hirðinum – birt 25. febrúar

4. Eyrnalokkar úr stífaðri blúndu – birt 29. apríl

3. Garnboltaskraut á seríu – birt 18. mars

2. Nálaveski – birt 1. júlí

1. Skartgripahengi úr gömlum ramma – birt 8. apríl

FF #47

Er ekki ágætt að rifja þetta upp svona þegar fer að líða að jólum? Þarna set ég mér m.a. það markmið að læra að hekla mér til handagagns! Það er einmitt svolítið í föndri dagsins sem ég vildi sýna ykkur (sérstaklega Skruddunum mínum sem gáfu mér allt til hekls í afmælisgjöf 🙂 )

Þetta er reyndar enn í vinnslu, þ.e.a.s. ég er ekki búin en þó komin nokkuð langt með marglitt ullarteppi!

Hugmyndin er frá Erlu vinkonu sem gerði svona teppi og þegar ég rakst á auðveldar leiðbeiningar á netinu (hér) ákvað ég að slá til!

Uppskriftin er (held ég) nokkuð einföld:

Byrjað er á að fitja upp loftlykkjur (chain crochet), ég hætti í rauninni þegar ég hafði náð nógu mörgum í þá breidd á teppinu sem ég vildi. Á endanum eru gerðar tvær aukalykkjur til að geta byrjað á fyrstu „litalínunni“. Þá er gerður fastahekl (double crochet) í hverja keðju sem fitjað var upp á. Þegar þessi fyrsta litalína er búin er garnið klippt og dregið í gegnum síðustu lykkjuna til að búa til hnút. Síðan er næsti litatónn – og lykkja sett á garnið. Galdurinn er svo að stinga heklunálinni alltaf á milli tveggja fastahekla og þannig myndast mynstrið í teppið. Þegar búið er að þræða í gegnum gatið er slegið tvisvar upp á heklunálina og svo heklað fastahekl í framhaldinu. Þegar þessi lína er búin er heklað tvisvar sinnum fastahekl í lokin áður en gengið er frá endanum.

– kannski auðveldara að átta sig á myndunum:

Í sumar byrjaði ég og þá gekk þetta ansi hægt:

en nú er rífandi gangur í þessu hjá mér, ég hef meira að segja náð að mastera sjónvarpsgláp og hekl í einu!

Svona lítur teppið út í dag – og það sést að það er enn í vinnslu! Ég hef notað ýmis konar garn í það, afganga og nýtt garn og það gerir það dálítið sérstakt og áferðin verður skemmtileg. Eitt gott tips (sem ég held ég hafi fengið frá Erlu): Að ganga frá endunum jafnóðum! 😉

Það góða er að hvað það er kósí að sitja með það yfir hnjánum á köldum kvöldum og hekla…

Mér fannst nokkuð viðeigandi að síðasta Fimmtudagsföndrið fyrir jóladagatalsbrjálæðið í desember væri jafnframt eitt af handavinnumarkmiðum ársins 2010!!

Eruð þið svo ekki spennt fyrir jóladagatalinu – sem hefst í næstu viku???

Einhverjar óskir um föndur?

FF #46

Í gær föndraði ég dulítið fílt. Eins og þið vitið sennilega er fílt nokkuð þykkt ullarefni sem hægt er að klippa til og móta af vild. Það minnir mig alltaf dálítið á veturinn og því við hæfi að gera litríkt vetrarhálsmen úr fílti sem hlýjar manni á hálsinum um leið og það lítur smekklega út.

Hugmyndin er héðan frá hinu ótrúlega skemmtilega bloggi vefverslunarinnar Papernstitch.com.

Til að gera þetta þarf því marglitt fíltefni, gott fljótandi lím, skæri, nál og tvinna. Byrjað er á því að móta hringi í fíltið.

Hringirnir tveir eru svo límdir saman…

… og klippt upp í þá á fjóra vegu:

Þá er það saumaskapurinn, hornin eru brotin inn að miðju og saumuð föst:

– ekki mjög flókið! Á endanum minnir fílthringurinn dálítið á 17.júní-rellu! 🙂

Síðan er perla eða annað skraut sett í miðjuna, en má þó sleppa (getur verið gott að gera það til að fela saumana).

Þá eru skraut“rellurnar“ tilbúnar. Ég ætlaði að gera úr þeim hálsmen og varð því að sauma þær saman:

– gerði það á brúnunum þar sem þær mætast.

Svo gataði ég fyrir festingum með nálinni og festi svo granna keðju í. Ég gerði líka tvær nælur þar sem ég setti annars konar skraut í miðjuna og saumaði nælufestingu aftan á.

Hlýtt og fínt! 🙂 Að ég tali nú ekki um litríkt í skammdeginu!

FF #45

Föndrið í dag er alveg ótrúlega einfalt – tók mig ekki nema 15 mínútur að gera!

Ég þurfti að pakka inn afmælisgjöf og vantaði e-ð lítið skraut til að setja punktinn yfir i-ið. Þá datt mér þessi hugmynd í hug; pakkaskraut úr marglitum pappír. Og af því að ég er með landakort á heilanum (sjá hér, hér og hér) ákvað ég að nýta þau í þetta 🙂

Það sem þarf er því landakort eða annar marglitur/skrautlegur pappír, skæri eða pappírshnífur, heftari og tvöfalt límband/lím.

Pappírinn er klipptur niður í 9 búta, í rauninni mega þeir vera af hvaða lengd sem er (ég notaði lengst ca. 7-8 cm langa og 1 cm breiða). 3 eru lengstir, næstu 3 eru u.þ.b. 1 cm styttri og næstu tveir 1 cm styttri en þeir. Síðasti búturinn er rétt um þumlungur að lengd.

Hver og einn bútur er brotinn saman í slaufu og heftaður saman í miðjunni.

Minnsti búturinn er rúllaður upp í kúlu og límdur með tvöföldu límbandi.

Þá er slaufunum raðað saman eftir stærð, hverri ofan á aðra. Þær eru límdar saman í miðjunni með tvöföldu límbandi.

Í lokin er svo kúlunni tyllt í miðjuna. Og þá er skrautið tilbúið!

Skrautið verður aðeins meira „púffí“ ef maður brýtur örlítið upp á hornin á hverri slaufu fyrir sig áður en þær eru límdar saman.

Svo er bara að skella þessu á pakkann – með smávegis límbandi! 🙂

FF #44

Nú er veturinn almennilega genginn í garð hérna fyrir sunnan og það fer að líða að lokum fimmtudagsföndursins hjá mér, ekki nema tveir mánuðir eftir af þessu skemmtilega ársverkefni þar sem ég föndra e-ð í hverri viku! Ótrúlegt að hafa haldið það út svona lengi 🙂

Í dag bjó ég til dúskahálsmen/ennisband úr gömlum bómullarbol. Hugmyndin er af þessari síðu (þar eru líka allar leiðbeiningar) og útfærslurnar hjá henni eru ótrúlega krúttlegar, t.d.:

Ég gerði þetta örlítið öðruvísi. Það sem ég notaði var bómullarbolur í tveimur litum sem var með áföstum blettum og orðinn of lítill á mig, skæri, smávegis pappabútur og sterkt garn (t.d. sláturgarn).

Ég byrjaði á að klippa ermarnar frá…

… og klippti þær svo í ca. fingurbreiðar lengjur. Það er allt í lagi að saumarnir komi með og líka að lengjurnar séu fleiri en ein fyrir hvern dúsk.

Ég vafði svo lengjunum nokkuð þétt upp á pappaspjaldið. Síðan er sláturgarnið bundið utan um öðru megin. Ég notaði nál til að þræða í gegn því að þetta var orðið nokkuð þykkt í lokin.

Þegar búið er að binda lengjurnar saman er spjaldið tekið og allur vöndullinn bundinn saman í miðjunni. Þá er hægt að klippa dúskinn í sundur – eins og sýnt er í leiðbeiningunum:

Minn dúskur leit þá svona út:

Ég gerði svo annan bláan úr hinni erminni og ögn stærri hvítan úr bolnum sjálfum:

Ég klippti svo breiðan borða úr bolnum og notaði sem festi. Dúskarnir voru bara saumaðir á hann í lokin. Ég gerði það þannig að skilja eftir einn eða tvo „kósa“ í dúsknum óklippta og með þeim gat ég þrætt dúskana upp á festina. Ég passaði samt að sauma dúskana vel fasta, því að þeir eru töluvert þungir.

Þá er hér komið nokkurs konar fjölnota ennisband/hárskraut –

– og hálsmen sem bundið er um hálsinn!

FF #43

Ef þið skoðið föndurblogg jafnmikið og ég (sem er nú kannski hæpið) hafið þið sennilega rekist á silhouette-skreytingar sem hafa tröllriðið öllu. Fólk býr til skuggamyndir af prófíl barnanna sinna o.fl. Mér finnast bollar með skuggamyndum sérstaklega skemmtilegir, t.d. hjá þessari hér.  Svo eru yfirvaraskeggsbollar sprenghlægilegir:

Ég ákvað að prófa að fríska upp á nokkra þreytta hvíta bolla sem voru til heima.

Ég notaði stensla, postulínsmálninguna PermEnamel (keypt í Föndurstofunni) og svamp. Eftir á að hyggja hefði ég e.t.v. átt að fjárfesta í mjóum pensli en lét svampinn duga í þetta skipti. Það er einnig hægt að spreyja á bollana en þá þarf að passa að spreyið þoli þvotta!

Ég byrjaði á því að velja mér stenslamyndir af netinu og skar þær út.

Ég límdi þær svo á bollana…

… og málaði með svampinum. Áferðin varð dálítið „hraunuð“ en skemmtileg.

Ég verð nú að viðurkenna að bollarnir urðu misfallegir og kannski helst til „fjarskafallegir“ 🙂

Yfirvaraskeggsbollinn kom líka vel út:

… ég setti örlítið skegg hinum megin á hann líka!

Svo er bara að fá sér tebolla!

FF #42

Föndrið í dag er útsaumaður dúkur (löber) sem ég kláraði í sumar og langaði að sýna ykkur. Ég saumaði hann með krosssaumi í grábrúnan hör og notaði hvítan og dökkgráan þráð.

Mér finnst ofsalega gaman að sauma út en HRIKALEGA leiðinlegt að ganga frá stykkjunum þegar saumnum er lokið. Svo leiðinlegt reyndar að ég er með heilu staflana af ókláruðum verkefnum hjá mér sem þarf bara örlítið að ganga frá.

Ég hef sko yfirleitt fengið mömmu til að hjálpa mér með þessa praktísku hluti en ákvað að reyna að bjarga mér sjálf núna eftir að hafa fengið sömu leiðbeiningarnar þúsund sinnum! 🙂

Á svona dúk/löber þarf náttúrulega ekkert annað að gera en að ganga frá kantinum og strauja. Best er að byrja að brjóta kantinn inn á röngunni, tvöfalt:

… og festa niður…

… svo er bara saumað allan hringinn. Í hornunum klippti ég upprúllaða kantinn aðeins til svo að hann passaði ofan á hinn á móti og saumaði hann svo við.

Sko, þetta gat ég! Miklu minna mál en ég hafði gert mér grein fyrir og fínn dúkur á skenkinn í stofunni kominn með lítilli fyrirhöfn!

FF #41

Ég lagði loksins í að sauma mér annan kjól – í þetta sinn kjól úr tveimur stuttermabolum (double t-shirt dress). Þetta var sum sé hugmyndin sbr. myndina hér að neðan (tekin af Burdastyle.com) en aðlöguð og staðfærð svolítið.

Það sem þarf til eru tveir stórir stuttermabolir (helst karlmanna og helst í XL-XXL), skæri og saumavél.

Til að byrja með er hálsmálið klippt af báðum stuttermabolunum…

… annar þeirra kemur nefnilega til með að verða neðri hluti kjólsins (pilsið) og hinn efri hlutinn – með stórum kraga 🙂

Ef við byrjum á neðri hlutanum þá eru ermarnar klipptar til og saumaðar saman til að mynda grunna vasa. Með því að sauma þetta svona við efri hlutann koma þessir skemmtilegu vængir í efnið yfir mjaðmirnar.

Ég púlla hins vegar engan veginn svoleiðis aukavídd á mjaðmirnar og vildi aðeins breyta sniðinu á kjólnum og laga að mínum líkamsvexti. Þess vegna ákvað ég að nota neðri bolinn bara sem strokk, þ.e. klippti af ermarnar.

Ég breytti líka aðeins og saumaði saman renning af svörtu jersey-efni til að nota á milli bolanna tveggja, undir brjóstin.

Af minni takmörkuðu reynslu af saumaskap hef ég komist að því að jersey-efni er ekki það skemmtilegasta að sauma. Best er að ganga frá saumnum þannig að efnin eru saumuð saman með sikksakki og over-lockað yfir endana. Annars er hætta á að saumaspretta verði þegar farið er í kjólinn og það teygist á efninu.

Fyrst saumaði ég svarta strokkinn við efri hluta kjólsins og svona kom það út:

Ég bætti svo neðri hlutanum neðan við svarta strokkinn og þá kemur þetta nokkurn veginn svona út:

Eins og sést er kraginn mjög stór og hægt að leika sér með hann á ýmsa vegu!

Þetta væri t.d. hinn fullkomni Airwaves-kjóll: Léttur og hægt að svitna í honum í trylltum dansi 🙂

Fimmtudagsgjöfin!

Rétt í þessu dró ég úr kommentunum ykkar, gott fólk!

Upp úr pottinum kom nafnið hennar Emilíu, sem skildi eftir þetta krúttlega komment:

– ég hugsa að ég renni nú bara til þín við tækifæri, Emma mín, með hjörtun! Til lukku 🙂

FF #40 – fimmtudagsgjöfin!

Í dag langar mig að endurtaka það sem ég gerði í sumar – FIMMTUDAGSGJÖFINA! Í þetta sinn er föndur dagsins jafnframt fimmtudagsgjöfin. Þetta er smá leikur sem ég vildi gjarnan að þú, lesandi góður, tækir þátt í.

Það sem þú þarft að gera er:
1. Lesa póstinn
2. Skilja eftir nafn og skilaboð um að þig langi að taka þátt í athugasemdum/kommentum. Það er allt í lagi þó að þú skoðir þetta blogg bara stundum eða þekkir mig ekki persónulega – það er alltaf gaman að fá komment 🙂
3. Fylgjast með hér á blogginu eða á Facebook, því að kl. 10 á mánudagsmorgun (11.10.2010) dreg ég einn heppinn lesanda út sem fær fimmtudagsgjöfina senda í pósti! 🙂

Nú, eigum við þá að vinda okkur í föndur dagsins?

Ég er alltaf pínu svag fyrir landakortum og ýmsum möguleikum þeirra (hefurðu kannski tekið eftir því? Bendi þér á þetta og þetta). Ég sá mjög skemmtileg hjörtu gerð úr landakortum á þessari síðu hér og datt í hug að það væri sniðugt að prófa þau og velja skemmtilega staði á íslenskum kortum.

Það sem þarf eru gömul og sjarmerandi landakort, saumnál og þráður og smá tróð/efni.

Ég byrjaði að klippa út skapalón fyrir hjartað:

Svo klippti ég út úr kortunum hjörtu á réttum stöðum, tvö hjörtu fyrir hvert:

Hjörtun eru svo saumuð saman á kantinum til að gera eitt. Passa þarf að skilja eftir smávegis gat á einum stað til að setja tróðið í:

Ég notaði tróð úr gömlu bómullarefni.

Þegar hjörtun eru tilbúin verða þau skemmtilega bústin!

Ég festi svo bönd í þau og þau sóma sér vel sem hvers kyns skraut, t.d. upp á vegg, á pakka o.fl.

Mundu að kvitta fyrir lesturinn – og til að taka þátt í leiknum! Fylgstu svo spennt/-ur með á mánudaginn! 🙂