Jóladagatal #3

3. hluti af jólaföndursdagatalinu er pínulítið projekt sem ég dundaði mér við í gærkvöldi. Og tók ekki nema ca. 15 mínútur! Það er kanilstangakertastjaki.

Það sem þarf er lítill glær kertastjaki fyrir sprittkerti, dobbelteip, límbyssa (nýjasta græjan mín!) og svo auðvitað kanilstangir! Ég þurfti að nota 3 poka af kanilstöngum (4-5 í pakka). Kanilstangir eru virkilega ódýrt föndurefni, pokinn kostar 67 krónur í Bónus og svo er bæði hægt að nota þær sem föndurefni en líka sem ilmefni.

Allur galdurinn felst í því að líma kanilstangirnar á kertastjakann, that’s it! Ólyginn tjáði mér að lím úr límbyssum virkaði ekkert voðalega vel á gler og því þyrfti maður að setja dobbelteip fyrst:

En svo getur maður hafist handa við að líma stangirnar á stjakann.Gott að hafa dagblað undir því að ef maður (lesist = ég) er að nota límbyssu í fyrsta sinn þá fer allt út um allt:

Að lokum lítur þetta þá svona út:

Síðan er hægt að skreyta stjakann að vild. Ég setti borða og notaði svo gamlan smellueyrnalokk sem setti punktinn yfir i-ið, finnst ykkur það ekki?

(Hugmynd: Héðan og þaðan af netinu, myndir t.d. hér og hér)

Jóladagatal #2

Jólaföndur nr. 2 í röðinni er öðruvísi jóladagatal.

Ég hef nú ekki vanist því að fá pakkadagatal en mér hefur alltaf fundist það svolítið krúttleg hugmynd.
Hér er ein skemmtileg hugmynd:

Hér eru trjágreinar settar í vasa og 24 lítil kramarhús hengd á greinarnar. Það sem þarf til að gera kramarhúsin er umbúðapappír (í þykkara lagi), gatari, lím og skæri. Kramarhúsin eru klippt út úr pappanum, límd saman og gat gert fyrir snærið.

Hvert kramarhús er síðan merkt með númeri og hengt á tréð. Síðan eru þau fyllt af litlum smáhlutum, sælgæti eða bara fallegum orðum, t.d. litlu ljóði.

(Hugmynd: Stolið samviskulaust héðan)

Jóladagatal #1

Þá er bara kominn 1. desember!
Þið sem hafið verið að fylgjast með þessu bloggi í lengri tíma vitið hvað það þýðir…

JÓLADAGATAL!

Í fyrra póstaði ég jólalögum af youtube á hverjum degi, ógurlega skemmtilegt. Í hitteðfyrra voru það svo jólatextarnir og -vísurnar og þar áður, 2006, var jólalagakosningin mikla þar sem Last Christmas og Nóttin var sú ágæt ein unnu með miklum yfirburðum.

Í ár ætla ég að víkja frá jólalögunum og að… darararamm… JÓLAFÖNDRI!

Á hverjum degi ætla ég að setja inn sniðugt og skemmtilegt jólaföndur af einhverju tagi sem lesendur geta svo spreytt sig á. Jújú, ég ætla að taka mér Herdísi Egilsdóttur til fyrirmyndar og föndra sjálf!!! Svo vil ég fá komment frá ykkur og ábendingar og ekki væri verra ef þið hermduð eftir og póstuðuð afrakstrinum í athugasemdadálkinn!!

Fyrsta jólaföndrið er jólakrans úr gömlum jólakortum, sem ég er viss um að liggja í bunkum á fleiri heimilum en bara hjá mér.

Það sem til þarf er:

• Nóg af gömlum jólakortum með fallegum myndum
• Skæri/dúkahnífur
• Skapalón að einiviðarlaufi (sjá hér)
• Frauðplasthring ca. 25 cm í þvermál
• Tannstöngla
• Fljótandi lím

Ég braut tannstönglana í tvennt þannig að ég fékk tvo bita sem hvor um sig höfðu einn hvassan enda og annan sem var beinn. Tannstönglarnir eru svo límdir aftan á laufblöðin þannig að hvassi endinn snúi niður (sést e.t.v. betur á myndinni):

Þegar límið hefur þornað er lítið mál að raða laufblöðunum á frauðplasthringinn hvert ofan á annað í hring. Þá fær maður krans sem getur litið svona út:

Og svona þegar hann er kominn á útihurðina:

(Hugmynd: Stolið héðan en staðfærð)

Myndablogg #43

Almáttugur, er ég ekki alveg að gleyma bókahillu vikunnar?

Nú þegar plássið er að minnka í mínum bókahillum læt ég mig dreyma um hillur sem hægt er að setja yfir hurðir og nýta þar með “dauða” plássið fyrir ofan. T.d. svona:

(myndir via t.d. Design*Sponge, I Suwannee og Freshome)

Þetta er líka sniðug hugmynd þar sem hátt er til lofts (ætli maður verði samt ekki að passa að setja ekki uppáhaldsbækurnar sínar þarna sem maður vill grípa í með lítilli fyrirhöfn )

Þessi tók þetta svo bara alla leið!

Myndablogg #42

Frábært spilakvöld hjá Spilaklúbbi norðursins í gærkvöldi.
Við fengum VIP-prófun á nýjasta og flottasta borðspilinu sem kemur út fyrir jólin (en er ekki actually komið út), Heilaspuna!!

Aðstandendur spilsins auglýstu á Facebook eftir spilaklúbbum til að prófa og ég fékk flökkueintak lánað hjá þeim fyrir spilakvöldið í gær. Á eftir skrifuðum við svo í gestabók nokkrar ábendingar og einkunnir fyrir spilið.

Spilið sjálft er spil eins og allir hafa beðið eftir sem fíla Fimbulfamb. Þar sem ekki fæst leyfi til að gefa Fimbulfamb út að nýju vegna höfundarréttamála er þetta því það næsta sem maður kemst því í dag! Spilið felst (eins og Fimbulfamb) í því að vera besti lygarinn og semja skýringar sem eru sennilegar. Maður getur samið skýringu á orði eða slangri, búið til atburð sem gerðist út frá fyrir fram gefinni dagsetningu, skrifað aftan á bókakápu út frá heiti bókar (sem er algjörlega sprenghlægilegt), útskýrt orðtak, snjallyrði eða búið til skýringu um íslenskar vættir. Allt er þetta mjög skemmtilegt og þjóðlegt.
Spilaklúbbi norðursins fannst Heilaspuni frábært spil og eru meðlimir harðákveðnir í því að þetta sé jólagjöfin í ár!

Myndablogg #41

Ég er dottin í nostalgíuna. Eftir að Skjár1 lokaði höfum við skötuhjúin horft á hitt og þetta á kvöldin. Tókum nokkur kvöld í að horfa á Nonna og Manna-þættina sem eru jafndásamlegir og þeir voru fyrir 20 árum.
Ég er svo byrjuð að kafa í gömlum Will&Grace-spólum, sem eru með skemmtilegra sjónvarpsefni sem framleitt hefur verið: Einu þættirnir sem ég hef fengið fráhvarf frá og VARÐ að sjá!! Það er bara alltof ljúft að rifja upp móment með gömlu vinunum undir teppi uppi í sófa.

Myndablogg #40

Yndislegt veður í dag, reif aðeins í lungun þegar ég fór út að labba áðan. En alveg blæjalogn.

Sólin er nú líka alltaf velkomin, sérstaklega þegar baráttan við skammdegið stendur sem hæst:

Myndablogg #39

Takk fyrir kommentin við síðustu færslu Gaman að heyra hvað sumir eru víðförlir…

Ég ætla að slengja hérna inn einni mynd frá því í október þegar við vorum á Akureyri. Þá fórum við í Jólahúsið. Ef einhver er í vafa þá vil ég ítreka það hér með að það er algjör skylda að fara þangað þegar maður er á Akureyri. Þar má þó greinilega finna ýmsa vafasama jólavöru…

Jólafílingur, anyone? (hehe)

Myndablogg #38

Á þessari síðu (eins og örugglega fjölmörgum öðrum) er listi yfir 100 staði sem þú verður að heimsækja áður en þú deyrð.

Af þessum stöðum hef ég heimsótt: 2) Kínamúrinn, 13) Great Barrier Reef, 41) sýkin í Feneyjum, 67) Flórens, 89) British Museum og 97) Neuschwanstein-kastalann. Það gera 6 af 100 stöðum! Ég á sko nóg eftir

Hvert hefur þú komið? Og myndirðu vilja sjá e-ð annað á þessum lista?

Myndablogg #37

Kominn tími á föstudags-playlistann
Svona rétt til að hefja helgina með smá fíling…

1. Robyn – Should Have Known
2. Sahara Hotnights – Fall Into Line
3. Bergþóra Árnadóttir – Gott áttu veröld
4. The Ravonettes – My Boyfriend’s Back
5. Des’ree – You Gotta Be
6. The Searchers – Sweets for My Sweet
7. Opus – Life Is Life
8. Retro Stefson – Montana
9. Sébastien Tellier – Divine
10. Yelle – Ce Jeu

P.s. mottóið mitt um helgina (sem og alla aðra daga) ætti að vera þetta hér: